Entoni Russo 3 fevral 1970-ci ildə ABŞ-ın Klivlend şəhərində anadan olub. Benedikt orta məktəbində oxuyub, daha sonra Keys Vestern universitetinin məzunu olub. Filmlərini başlıca olaraq qardaşı Co Russo ilə birlikdə çəkdiyinə görə adətən titrlərdə Russo qardaşları kimi təqdim olunurlar. “Gecikmiş inkişaf” komediya serialında gördükləri işə görə “Emmi” mükafatı qazanıblar. Çəkdikləri ilk film qısametrajlı “Parçalar” adlı filmdir. Filmin çəkilişlərini öz hesablarına kredit kartları vasitəsilə maliyyələşdiriblər. Kinofestivalda həmin filmi bəyənən Stiven Soderberq onların çəkəcəyi filmə prodüserlik etməyi təklif edir. Həmin film baş rolda Corc Kluninin çəkildiyi “Kollinvuda xoş gəlmişsiniz” kriminal komediyası olur. Ardınca "FX" telekanalının icraçı prodüseri Kevin Raylli qardaşları “Bəxtəvər” serialının pilot epizodunu çəkməyə dəvət edir. Amerikalı rejissor Ron Hovard pilotun fanatı olub və onlara “Fox” telekanalında “Gecikmiş inkişaf” serialının pilot epizodunu çəkməyi təklif edir. Həmin epizod qardaşlara “Emmi” mükafatı qazandırır. 2006-cı ildə Russo qardaşları kinoya qayıdaraq, baş rolda Ouen Uilsonun çəkildiyi “Mən, o və onun dostları” komediyasını lentə alırlar. Film böyük kassa uğuru qazanır və dünya üzrə kinoteatrlardan 140 milyon dollar toplayır. 2013-cü ildə qardaşlar "Marvel Studios" şirkətinin “Birinci qisasçı: Başqa müharibə” filminin çəkilişlərini yekunlaşdırır. Fantastik franşizanın epizodu 4 aprel 2014-cü ildə böyük ekranlara çıxır. 2018-ci ildə qardaşlar “Qisasçılar: Sonsuzluq savaşı” filmini çəkib. 

Ətraflı məlumat üçün aşağıdakı linkə basın:

https://tr.wikipedia.org/wiki/Russo_karde%C5%9Fler